O XXI Festival de Cans arrinca este martes coa proxección do documental ‘Acordamos’ de Uxía Senlle
A XXI edición do Festival de Cans arrincará oficialmente este martes, coa apertura da ‘rúa efémera’, que este ano se dedica a Dolores Ben, e coa proxección do documental ‘Acordamos’, de Uxía Senlle e Lucas Terceiro, entre outras actividades.
O Festival de Cans, na súa vixésima primeira edición, preséntase como un escaparate vibrante da cultura audiovisual contemporánea, ofrecendo unha plataforma para cineastas emerxentes e establecidos. Cunha programación que inclúe desde documentais conmovedores ata curtametraxes innovadoras e videoclips creativos, o festival celebra a diversidade e a creatividade no cinema.
As actividades previas e as exposicións temáticas, como ‘Cans Cartaces’ e ‘Reservoir Cans’, xa sentaron as bases para unha experiencia inmersiva. Ademais, a inclusión de debates sobre a produción cinematográfica e concertos en vivo engade unha dimensión interactiva e dinámica ao evento. Coa presenza de figuras destacadas como David Trueba e María Vázquez, o festival non só honra as traxectorias establecidas, senón que tamén abre camiños para as novas voces do cinema, asegurando que o espírito innovador de Cans continúe inspirando ás futuras xeracións de creadores audiovisuais.
O director de cinema David Trueba participará nun coloquio cos veciños e visitantes o sábado 25. A actriz María Vázquez, moi vinculada ao festival desde hai anos, recibirá o venres 24 o Premio Pedigree de Honra que recoñece o seu especial agarimo cara a Cans e a súa traxectoria como unha das intérpretes españolas máis importantes dos últimos anos.
No apartado musical, o mércores 22 terá lugar unha homenaxe ao músico vasco Kepa Junquera, no que estará presente o propio artista que dará nome a un Jaliñeiro. Neste espazo o propio Junquera realizou unha actuación histórica fai dez anos. A homenaxe completarase coa exhibición de dúas pezas documentais sobre o acordeonista, que sufriu un ictus hai uns anos.
Na súa XXI edición do 21 ao 25 de maio, contará cun completo cartaz de grupos e solistas de distintos estilos e tendencias, entre os que destaca a presenza da banda de Muros The Rapants, o grupo galego de moda, xunto a outras bandas como Combo Paradiso ou Lontreira e artistas como Nat Simons ou a gaiteira Susana Seivane.
SUSANA SEIVANE E SU GARRIDO NO INVERNADOIRO
No espazo Invernadoiro Rei Zentolo de Juan e Mucha do Peso, que combina música e proxeccións audiovisuais, terá lugar o sábado a actuación da gaiteira Susana Seivane, que ofrecerá unha actuación especial para celebrar os seus 25 anos de traxectoria. Ademais, Seivane presentará en Cans a audiovisual “Son Seivane” dirixida polo realizador Xosé Antón Bocixa.
Polo mesmo espazo tamén pasará a cantautora Su Garrido Pombo presentando o seu proxecto “Patios de Luz”, que une a música e o cine nun documental dirixido por Fran Rodríguez Casal, que explora a relación da luz e dos espazos. Os concertos de Seivane e Garrido son os únicos de pago do festival (entradas a 5 euros) dado o aforo limitado a só 100 persoas do Invernadoiro.
