A Candeloria alonga a temporada de festivais en Lugo ata novembro con “Pista Extra”
Concertos de Non Servium, El Drogas ou Def Con Dos
O festival de rock, ska, rap e punk presenta unha noite de festa no Pazo das Feiras e Congresos de Lugo o 30 de novembro con máis de media ducia de concertos
“Pista Extra” conta xa con máis do 60% das entradas vendidas, que se poden adquirir na páxina web do festival acandeloria.org
O festival A Candeloria, que celebrou o seu décimo aniversario o pasado mes de marzo, anuncia unha nova noite de concertos para o mes de novembro. A “Pista Extra” será o primeiro festival en Lugo case no inverno, desestacionalizando a temporada de grandes eventos: “Nesta data non hai moita programación musical e queremos colaborar co tecido cultural lucense cunha programación que segue o estilo de A Candeloria, cos mesmos valores”, explica Manu Fernández, director do festival. Unha programación coa que Lugo será o centro da música rock, ska, rap ou punk no noroeste da península, que espera xuntar ás 3.500 persoas que encheron durante a última edición de A Candeloria o Pazo das Feiras e Congresos de Lugo. O aforo xa conta co 60% das entradas vendidas.
O 30 de novembro “Pista Extra” presentará unha proposta formada por grupos de rock, ska, rap ou punk que segue a estela de A Candeloria, entre os que destacan El Drogas ou Non Servium, a banda de Móstoles xa pisou Lugo en 2018 e volven agora a presentar o tour Criatura. Ademáis, “Pista Extra” será palco de despedidas, nesta ocasión a banda Def Con Dos elixe Galicia para dar o seu último concerto da xira “Mutantes pal Pueblo”, na que repasan as cancións máis emblemáticas dos máis de 30 anos de traxectoria da banda. A nivel internacional chegará á cidade Banda Bassotti, grupo italiano de ska punk, unha das grandes bandas do xénero no seu país. Completan o cartaz os galegos Familia Caamagno; o dúo valenciano Machete en Boca; a banda Ruxe Ruxe; a “brass band” feminina Brassica Rapa e o Dj Jordi Pánico.
As entradas pódense adquirir na páxina web do festival acandeloria.org
